Pangasinan Food

Bangus with pesto

Prawns with sweet and sour sauce

Pineapple chicken with potato salad

Steamed prawns with herbs

Inihaw na bangus with atchara


Bangus steak


Seafood salad

SAY ARO

Ibanghilyo Jn. 15:9-17

Inkuanen Jesus ed saray disipulo to: "No panoy panangaroy Ama ed siak, ontan met so panangarok ed sikayo; mansiansia kayod arok. No onuren yo ray ganggan ko, mansiansia kayod arok; singa siak, oonuren ko ray ganggan nen Amak, kanyan mansiasiansia ak ed aro to.

"Imbagak ira yad sikayo, pian niwala ed sikayo so liket ko, tan nayadyari so liket yo. Sikato yay ganggan ko: manaarowan kayo a singa panangarok ed sikayo. Anggapoy toon babaleg so panangaro tod saray kakaaro to nen say toon mangibagat na bilay to para sikara. Kakaaro ta kayo, no onuren yo ray ganggan ko. Ag ta ki la ipapasen ya aripen natan, ta ag kabat na aripen so gagawaey katawan to. Ipapasen ta ki lan kakaaro, lapud impaamtak ed sikayo ray amin a nadngel kod Amak. Ag yo ak pinili; pinili tan tinoro ta kayon onla tan mambungay maando. Diad ontan, iter na Ama so amin a bengatlan kerewen yod ngaran ko. Saya sirin so ganggan kod sikayo: manaarowan kayo."

MOTEKTEK

SAY SANGA TAN BUNGA

Ibanghilyo (Jn. 15:1-8)

Inkuanen Jesus ed saray disipulo to: "Siak so tuan sengeg na ubas, tan si Amak so managtanaman. Ekalen toy balang sangan ag mambunga tan palinan to so sangan mambubunga, pian lalon ondakel so bunga to. Malinis ki la lapud salitan imbagak ed sikayo. Mansiansia kid siak tan mansiansia ak ed sikayo. Ag makapambungay sanga no ag mansiansiad sengeg. Ontan met, ag kayo makapambunga no ag kayo mansiansiad siak.

"Siak so sengeg na ubas, sikayo ray sanga. Say mansiansiad siak tan siak ed sikato, mambungay dakerakel. Ta no andi ak, anggapoy nagawaan yo. Say ag mansiansiad siak, nibantak ed paway tan namagaan a singa sanga. Natipon tan nibantak ed apoy ira yan klasiy sanga, pian napoolan ira. No mansiansia kid siak tan mansiansiad sikayo ray salitak, kerew kayo na antokaman a labay yo, et nagamuran yo. No mambunga kayoy dakel, napagalangay Amak tan napatnagan a disipulo ta kayo."

MOTEKTEK

Diad ibanghelio tayo ed sayan Simba, nanengneng tayon si Kristo inusar to so sengeg, sanga tan bunga pian nipaamta to so kipapasen tayo ed say Dios tan say kipapasen met na Dios ed sikatayo. Saya may tatawagen dan "relationship" ed Ingles odino pibibiang o pikakasakey.

Angangko no natan mambibilay si Kristo et nialiling to so sayan pankakasakey tayo ed so celfon ya karaklan tayo et awalaan. Walay "connection" ya tatawagen. No angapo so "signal" angapo so tawag, pantotongtong. Say labay tayo et say maples, malinew tan maksil ya "connection." Pian ongawan makana yan celfon et nakaukulan ya dakel so "load" tan maung so "battery." No andi, nakaukulan so man-load tan man-recharge. No talagan makapuy ni et nakaukulan angango lan salatan so celfon.

Diad ibanghelio walarayan taloran abitla: sengeg, sanga tan bunga. Say sengeg et si Kristo, tan say managpabunga et say Ama. Nakaukulan mabiskeg iyan sengeg pian ag natumba, naagwat ed dalin, tan naanay o naderal na bigis. Et angapoy duarua say Katawan maksil ya sengeg na bilay tayo.

Kumadua, et say sanga. Duara so sanga ya binitla nen Hesus. Say onaan et say sangan ag manbubunga. Sayan angapoy kakanaan et nakaukulan ya ekalen, pamagaen tan puolan. No too yan angapo lay gagawaen to et makapataktakot ta singano say ipapaniring nen Hesus et say dusa. Say kumadua et say sangan mambubunga. Kuanen Hesus, nakaukulan ya ketelen may ulnos to pian mas lalon onsanga tan onsalumpapak tan ondakel so bunga to. Balet say tua, ansakit so naketelan, say likido umpaway tan no maminsan nabulok. Say ag makayari ompatey la. Balet nakaukulan iyan gawaen.

Say kumatlo et say bunga.Say kuan tayo, no antoy sengeg ontan met so bunga. Ag manbunga na manga so pantol. Diad bitbitla tayo, ulit-uliten tayo yan ibabaga tan ibabangat. Malinew ya talusan. Say panangasikaso ed sanga et sikato so makapangiter na maung ya bunga.

Si Kristo ed ibanghelio natan et say ibabaga to sirin ed sikatayo et sikato so sengeg tan sikatayo so sanga, tan say bunga tayo et manlapu ed inkasanga tayo.

Say panaon na Paskua et panaon no kapigan nengnengen tayo lamet so pikakasakey tayo ed Dios. Sikato so sengeg tan sikatayo so sanga. Maung, malet tan marakep kasi so pikakabiangan tayod Dios? Ampan nakaukulan tayo so mansalat na celfon, man-recharge odino manpa-load?

SAY MAUNG YA PASTOL

Inaon ed masanton ibanghilyo onung ed kinen Juan (10:11-18)

Inkuanen Jesus: "Siak so maung a pastol. Say maung a pastol isaklang toy bilay to para saray karniro. Say mimiupa ya aliwan pastol et ombatik no nanengneng ton nitan lay asod katakelan. Ibatikan to ray karniro lapud mimiupa labat, tan ag to kayaryan iray karniro. Kanyan sibaren tan buyaken na asod katakelan iray karniro. Ombatik ta mimiupa labat tan anggapoy panagkawanan tod saray karniro. Siak so maung a pastol. Kabat ko ray kanrnirok tan kabat da ak, a singa say Ama kabat to ak tan sikatoy kabat ko. Tan isaklang koy bilay ko para saray karniro. Wala ni ray arum a karnirok ya andi rad sayan koral. Nakaukolan ya ipitipon ko met ira. Dengelen da met so bosis ko tan diad onya, magmaliw a saksakey so poluk tan saksakey met so managpastol."

"Inaro ak na Ama lapud saya, ta isaklang koy bilay ko pian nabawik lamet. Anggapoy makaekal na bilay ko, balet isaklang kon manlapud siak a dili so bilay ko. Walay pakayaril a mangiter tan mamawiy bilay ko. Ingganggan nen Amak yan gawaen ko."

MOTEKTEK

Say Dios inkabat to so inka-Dios to diad impanpuyan to a sikato et Taloran-Sakey odino diad naaralan tayon doctrina ya Santissima Trinidad. Saksakey ya Dios, balet taloran personas: Say Ama, tan Say Anak, tan Say Ispiritu Santo. Kabat tayo so Dios lapud Anak ton HesuKristo ya sikato so ginmawan too ya angilaban ed sikatayo diad panamegley na impanirap, impatey tan inkioli to. Sarayan katwaan et inawat tayo diad panamegley na Simbaan ya angibangat ed sikatayo na bilay ya andi-anggaan.

Balet say Dios sakey ya misterio ya ag mainumay ya talusan. Sakey iyan misterio ya naawat no awalaan so too na pananisia. No anggapo so pananisia, ag naala iyan katwaan ed Dios ya sikato lanlamang so manangipapalabo. Ed Kristo balet, naitdan itayo ya pakanawnawa ya naalmo so Dios, nakabat, naaro. Ta lapud sikato niasingger so Dios ed sikatayo. Singano bilbilang diad sayan abasan ibanghelio ya nanlapud Juan 10.

Si Hesus so inkuan to, "Siak so maung ya pastol." Akin et maung ya pastol si Jesus?

Kabat to itayo. Sayan pankabat na Dios ed sikatayo et mabmabli. Araldalem so kabaliksan to ya no motekteken tayo. Walaray manooley, walaray walad posisyon odino pakayari, walaray totoon atagey so kawalaan da, ya ososdungan da labat iray walad leksab da. Ag da ra imimanoen, kakatongtongen, kakabaten. Atapew so panakakabat da tan angapo so natawag ya maung ya ulupan da. Duma ya tan aliwan onya so kiwawala na Dios ed bilay tayo. Sikato et maung ya pastol ta kabat to itayo. Anta to sa ngaran tayo, say nanlapuan tayo, say kawalaan tayo natan, tan saray pampipilalekan tayo. Aralem so pankabat to ed sikatayo ta anta to so inkasikatayo.

Say marakep ed sayan pankabat et say maung ya pastol et anta to met so kakapuyan tayo, saray kasalanan tayo, saray apalabas tayo. Balet inaksubi ta yan amin tan ag to itayo ibabaing. Inaro to itayo a singa sakey a pastol ya manaampupo ed saray karniro to, sakbaten to itayod saray takeb to, tan amamayoen to itayo. Agaylayan panangaro. Nayarian to ni ingen ya iter so bilay to ed sikatayo. Makapatenyeg na puso. Siopa ed saray kabat tayo, angano atateng odino kaaro so nibaga tayon makapangawa na saya? Angapoy duarua say Dios nagawaan to ta agawa to laya ed HesuKriston anak to.

Diad sayan panaon na Inkioli et nanengneng tayo so Dios ya tugtuan manangaro ya angiter na bilay to ed sikatayo. Sikato so onaasingger ya maung ya pastol, angaman no maminsan et onaarawi tayo odino arawrawi tayo la. Nakaukulan tayo so onlingaw, ompawil tan manayam ed solar na panangaro to.