Inaon ed masanton ibanghilyo onung ed kinen Juan (10:11-18)
Inkuanen Jesus: "Siak so maung a pastol. Say maung a pastol isaklang toy bilay to para saray karniro. Say mimiupa ya aliwan pastol et ombatik no nanengneng ton nitan lay asod katakelan. Ibatikan to ray karniro lapud mimiupa labat, tan ag to kayaryan iray karniro. Kanyan sibaren tan buyaken na asod katakelan iray karniro. Ombatik ta mimiupa labat tan anggapoy panagkawanan tod saray karniro. Siak so maung a pastol. Kabat ko ray kanrnirok tan kabat da ak, a singa say Ama kabat to ak tan sikatoy kabat ko. Tan isaklang koy bilay ko para saray karniro. Wala ni ray arum a karnirok ya andi rad sayan koral. Nakaukolan ya ipitipon ko met ira. Dengelen da met so bosis ko tan diad onya, magmaliw a saksakey so poluk tan saksakey met so managpastol."
"Inaro ak na Ama lapud saya, ta isaklang koy bilay ko pian nabawik lamet. Anggapoy makaekal na bilay ko, balet isaklang kon manlapud siak a dili so bilay ko. Walay pakayaril a mangiter tan mamawiy bilay ko. Ingganggan nen Amak yan gawaen ko."
MOTEKTEK
Say Dios inkabat to so inka-Dios to diad impanpuyan to a sikato et Taloran-Sakey odino diad naaralan tayon doctrina ya Santissima Trinidad. Saksakey ya Dios, balet taloran personas: Say Ama, tan Say Anak, tan Say Ispiritu Santo. Kabat tayo so Dios lapud Anak ton HesuKristo ya sikato so ginmawan too ya angilaban ed sikatayo diad panamegley na impanirap, impatey tan inkioli to. Sarayan katwaan et inawat tayo diad panamegley na Simbaan ya angibangat ed sikatayo na bilay ya andi-anggaan.
Balet say Dios sakey ya misterio ya ag mainumay ya talusan. Sakey iyan misterio ya naawat no awalaan so too na pananisia. No anggapo so pananisia, ag naala iyan katwaan ed Dios ya sikato lanlamang so manangipapalabo. Ed Kristo balet, naitdan itayo ya pakanawnawa ya naalmo so Dios, nakabat, naaro. Ta lapud sikato niasingger so Dios ed sikatayo. Singano bilbilang diad sayan abasan ibanghelio ya nanlapud Juan 10.
Si Hesus so inkuan to, "Siak so maung ya pastol." Akin et maung ya pastol si Jesus?
Kabat to itayo. Sayan pankabat na Dios ed sikatayo et mabmabli. Araldalem so kabaliksan to ya no motekteken tayo. Walaray manooley, walaray walad posisyon odino pakayari, walaray totoon atagey so kawalaan da, ya ososdungan da labat iray walad leksab da. Ag da ra imimanoen, kakatongtongen, kakabaten. Atapew so panakakabat da tan angapo so natawag ya maung ya ulupan da. Duma ya tan aliwan onya so kiwawala na Dios ed bilay tayo. Sikato et maung ya pastol ta kabat to itayo. Anta to sa ngaran tayo, say nanlapuan tayo, say kawalaan tayo natan, tan saray pampipilalekan tayo. Aralem so pankabat to ed sikatayo ta anta to so inkasikatayo.
Say marakep ed sayan pankabat et say maung ya pastol et anta to met so kakapuyan tayo, saray kasalanan tayo, saray apalabas tayo. Balet inaksubi ta yan amin tan ag to itayo ibabaing. Inaro to itayo a singa sakey a pastol ya manaampupo ed saray karniro to, sakbaten to itayod saray takeb to, tan amamayoen to itayo. Agaylayan panangaro. Nayarian to ni ingen ya iter so bilay to ed sikatayo. Makapatenyeg na puso. Siopa ed saray kabat tayo, angano atateng odino kaaro so nibaga tayon makapangawa na saya? Angapoy duarua say Dios nagawaan to ta agawa to laya ed HesuKriston anak to.
Diad sayan panaon na Inkioli et nanengneng tayo so Dios ya tugtuan manangaro ya angiter na bilay to ed sikatayo. Sikato so onaasingger ya maung ya pastol, angaman no maminsan et onaarawi tayo odino arawrawi tayo la. Nakaukulan tayo so onlingaw, ompawil tan manayam ed solar na panangaro to.
